KHANWA KA YUDHA. RANA SANGA. khanwa ka yudh kaha hua tha. KHANWA KE YUDH KI KHANAI

Kehte hai bahduro ke kisse ajeeb hote hai

Kyuki inhe dushman nahi apne hi daga dete hai...

Aaj hum aapke liye laaye hai us yoddha ki kahani jo ajey tha jise harana namumkin tha. aadha shareer gavane ke baad bhi jiska samna karne ki himmat kisi me nahi thi lekin kaise iski maut  ke baad bharat ka itihas badla. kaun tha wo mahaan veer.....

 

Ye baat tab ki hai jab babar Kabul se Hindustan fatah karne ke liye ek vishal fouj lekar nikla. Wo na sirf hindustan pe kabza karna chahta tha balki apne desh me ab tak jhel chuki sari haar ka badla bhi lena chahta tha.

Babur ek lambe safar ke baad akhir kar hindustan ki zameen par peshawar, lahore, shree nagar se hote huye punjab me Jhelam nadi ke kinare pahunchne Mein Kamyab Ho Gaya

 

Babar bharat aane ke baad apne delhi aur pure hindustan ka sultan banne ke apne lakshya ko haqiqat banane me jut gaya.

 

Daulat khan lodi ke bulave par bharat aaye babar ne kayi riyasaton ko apne kabze me kiya aur ant me, uska pehla bada yuddh -  panipat me ibrahim lodi ke khilaf lada. usme jeet hasil kar babur ne ye sabit kar diya ki wo sirf ek videshi akramanakari nahi hai balki wo yaha ka badshah banne ke liye aaya hai. Ibrahim lodi ki panipat ke yuddh me maut hone ke baad lodi vansh samapt ho gaya aur is tarah babur ne Delhi mein apni badshahat Kayam kar li

 

hindustan me uski hukumat to abhi bas shuru hi huyi thi. Apni saltanat ko sahi mayno me jamane aur yaha lambe samay tak badshah bane rehne ke liye use abhi kayi bade yuddh jitne the Aur panipat ki jeet ke baad uska agla muqabla mahan Yoddha Raana Sanga se Hone wala tha. Rana Sanga ka asli naam sangram Singh tha. Wo mahan maharana kumbha ke pote aur Rana raimal Ke chote bete the. Apne Shasan kaal mein Rana Sanga Delhi Malwa aur Gujarat per Kai bar chadhaai kar Chuke the

 

Aisa kehte hai bharat me rana sanga ke daur me unse yuddh me takkar lene wala ek bhi raja maujud nahi tha. Sanga delhi me afgano ko harakar apni hindu satta waha fir se kayam karna chahte the lekin babar ke aane se unhe ye raah thodi mushkil dikhayi dene lagi kyuki babar na sirf delhi me balki pure bharat me apni badshahat failana chahta tha. Aur is sab ki wajah se sanga ne Babur ko delhi ka sultan manne se hi inkar kar diya.

 

 

Sanga khud ko bharat ka Samrat mante the aur isi wajah se unke rajya ki sarhade agra tak faili huyi thi  aur yaha se unka agla lakshy delhi par chadhayi kar ke waha apna rajyabhishek  karwana tha . Aur dusri taraf babar ko bhi ye baat bahot jald samajh me aa gayi ki Rana sanga ke hote huye wo kabhi bhi hindustan fateh nahi kar paayega. Aur isi wajah se dono ke saamne apni hukumat aur apna varchasv banaye rakhna ek chunauti ban gaya. Babur bharat me apne per jamane ke liye kayi chote bade rajyo par aakraman kar ke apna samrajy badhata ja raha tha aur apni sena ko mazbut se aur mazbut karta ja raha tha. Is tarah Babur ki hindustan jeetne ki bhookh badhti hi ja rahi thi aur jis tarah wo ek ke baad ek jeet hasil kiye ja raha tha usse saaf zahir tha ki uska muqabala Rana Sanga se ek din  jarur hoga

 

Sanga ab tak ye samajh kar chup baithe huye the ki babur dusre afghano ki tarah kuch waqt ke liye yaha lutpat kar ke wapas chala jayega lekin wo jis tarah apne rajya ki seemao ko badha raha tha Rana sanga ne samajh liya tha ki babar ka hindustan chodne ka koi irada nahi hai. is taraf satta hasil karne ki bhookh me andhe ho chuke babur ki nirdayata kayi guna badh gayi thi aur isi ke chalte usne agra, bayana, kalpi aur dhaulapur jaisi riyasaton par apna kabza jama liya aur inme se kuch Rana sanga ke rajya ki simaao me aate the. Ye sab hota dekh kar sanga ab chup baithne wale nahi the aur akhir kar  unhone babur ko sabak sikhane ki thani. iske liye sanga ne rajasthan ke sare bade rajao ko bulava bheja aur  babur ke khilaf ek bahot badi sena ikatthi kar li.

 

Is aag me ghee ka kaam kiya 2 logo ne. Hasan khan mewati aur mahmood lodi ne sanga ko babur ke khilaf yuddh karne ke liye uksaya ye keh kar ki usne aapke rajyo ko hadap liya hai. Aur is tarah rana sanga apni vishal sena lekar agra aur bayana ko wapas hasil karne ke liye rawana ho gaye. Bayana ke mughal shasak ko harane ke baad sanga ne sikri ko bhi apne kabze me liya. Aur yahi bahur ki sena ka ek hissa padav dale huye tha. Lagatar mil rahi haar ki wajah se babur ki sena ab dar gayi thi. Babur ke kuch karibi sainiko ne use kabul wapas laut jane ki salah bhi de dali lekin jab babur ne dekha ki uske bahaduro ka hausla tut raha hai to usne kabhi sharab na pine ki kasam unke samne khayi. Unki pagar duguni kar di. Unse liye jane wale sare kar maaf kar diye lekin sainiko ka hausala kisi bhi tarah wapas nahi aa raha tha tab bahur ne aakir me jihad ka nara diya aur jaise mari huyi sena me josh ki leher daud gayi. Babur ki sena naye josh se labrej ho kar sanga se ladne nikal padi.

 

Babur ki sena ne rajasthan ke bharatpur zile ke khanwa namak sthan par aakar padav daal diya. Babur ne chalaki se sanga ke lodi senapati ko lalach dekar sena sahit apni taraf bula liya.

Bigul nagade ranbheri baj uthi aur is tarah ye aitihasik yuddh shuru ho gaya aur dono senaye aapas me ladne lagi.

 

Babur apni sena ka piche se naitrutva kar raha tha jabki rana sanga apni sena ke aage apne hathi pe sawar hokar yuddh ka margdarshan kar rahe the. Babur ne panipat ke yuddh me jis tarah se ibrahim lodi ko apni nayi tuluguma paddhati se haraya tha wahi ran niti usne yaha khana me bhi dohrane ka faisla kiya. Use pata tha bharat me aag ugalne wali topo ka istemal isse pehle kisi ne nahi kiya tha aur isi baat ka fayda uthakar usne apne topkhano ko sena ke pichle hisso me chupakar rakh diya

 

Dekhte hi dekhte dono senao ke sainiko me

bheeshan yuddh shuru ho gaya. Sanga ki sena ke veer rajputo ne kuch hi waqt me babur ki sena ko charo taraf se gher liya. Rana sanga ne kam samay me hi yudhh ko apne paksh me kar liya. Rajput Afghan sainiko ko ladne ka mauka diye baghair tabadtod unko parast kiye ja rahe the. Jab maidan me sanga ki jeet pakki hoti dikhayi daur jab uski sena babur ki taraf badhne lagi tabhi babur ne apni sena ke pichle hisso me topkhane kholne ka sandesh bhijava diya.

 

Aur kuch hi palo me aag ugalte top ke gole sholo ki tarah sanga ki sena par garajne lage. Rajput sainiko ne aisa kuch pehle kabhi nahi dekha tha. Aag darshate wo gole sekdo rajput sainiko ko apni chapet me le rahe the. Sanga ki sena ka ek bada hissa in topo ki wajah se hatahat ho gaya. Hazaro sainik ghayal ho gaye aur hazaro ne apni jaan gawayi.

 

Apni sen ako is tarah nasht hota dekh kar rana sanga aag babula hokar bhi chitkar ke saath afgha sainiko par bijli ki tarah tut pade. Babur bahot soch samajh kar ye yuddh lad raha tha. Uske paas har musibat ka hal tha. Uski sena ke teerandazo ne rana sanga par nishana lagana shuru kar diya. Is hamle me ek teer sanga ko lag gaya wo dard se behosh hokar hathi se niche gir gaye. Unki is halat ko dekh kar unke ek vishwas patr sipahi ne unhe yuddh ke maidan se bahar bhijwa diya aur khud unka shahi bakhtarbadh pehen kar maidan me ladne laga.

 

Rana ke ghayal hone ki khabar jald hi rajput sainiko me aag ki tarah fail gayi aur unka hausla tutne laga. Babur ko yahi to chahiye tha. Uski sena se prachand veg se bachi khuchi rajput sena par hamla bol diya. Rajput sainik mare gaye aur is tarah khanwa ke maidan me babur ki sena ne rajputo ko puri tarah nasht kar diya. Aur is tarah Babur ne khanwa ke yuddh ko apne naam kar diya.

 

Jab rana ko hosh aaya tab tak bahot der ho chuki thi. Yuddh se aise peeth dikha kar aana unke rajputi shan ke khilaf tha. Ghayal hone ke bawajud unhone apne kuch bache huye sainiko ko fir se ikattha kiya aur fir yuddh ladne ki taiyari karne lage. Ghayal aur kamzor hone ki wajah se unhe khane ke liye jab baithaya gaya to unke hi ek bharosemand ne unke khane me zeher mila diya.

Aur is wajah se ranbhumi ke bahar ek mahan veer ko apne hi logo ne is duniya se vida kar diya. Ek aur sachha hindu raja apne logo ki gaddari ki bhent chadh gaya aur bharat ko fir se ek hindu rashtra banane ka unka sapna sapna hi reh gaya.

Dhokhe se hi sahi lekin Babur ye jung to jeet hi li. Aur is jeet ki khushi me Babur ne khud ko ghazi ki   padvi se nawaza.

Aur is tarah 17 march 1527 ka din bharat ke itihas me hamesha ke liye darj ho gaya. Aur is yuddh ke baad Babur ne bharat me mughal saltanat ko kayamkar diya.